«АВАНГАРД»

«Аванга́рд»

Газета, заснавана ў кастрычніку 1939 г. як орган Часовага ўпраўлення г. Лунінец і павета, павятовага камітэта КП(б)‌Б і павятовага выканаўчага камітэта Лунінецкага павета. У перыяд з 3 лютага 1940 г. да 19 чэрвеня 1941 г. орган Лунінецкага райкама КП(б)‌Б і раённага Савета дэпутатаў працоўных Пінскай вобласці.

У гады нямецка-фашысцкай акупацыі з’яўлялася органам Лунінецкага падпольнага райкама КП(б)‌Б. Выходзіла ў 1943–1944 гг. Вядома 45 нумароў (№ 1–18 за 1943; № 19–21, 3–26 за 1944) за перыяд з 23 жніўня 1943 г. да 7 ліпеня 1944 г. на беларускай мове. Рэдактары: А. А. Хацкевіч, П. П. Заяц (з 28.8.1943).

Пасля вызвалення БССР выдавалася пад той жа назвай. У 1962 г. назва змянілася на «Ленінскі шлях». З 1965 г. друкавалася ў якасці органа Лунінецкага райкама КПБ і раённага Савета дэпутатаў працоўных (Савет народных дэпутатаў з 1977) Брэсцкай вобласці.

З 1 студзеня 1991 г. раённая газета, выходзіць пад назвай «Лунінецкія навіны» на беларускай і рускай мовах 2 разы на тыдзень. Заснавальнікі — Лунінецкі раённы выканаўчы камітэт, Лунінецкі раённы Савет дэпутатаў.