Помнік загубленым гітлераўцамі жыхарам вёсак Тупічыцы і Вяда.
Тупі́чыцы (Тупі́чычы)
Вёска на тэрыторыі Івацэвіцкага раёна Брэсцкай вобласці, знішчаная нямецка-фашысцкімі захопнікамі разам з жыхарамі ў час Вялікай Айчыннай вайны.
Знаходзілася за 4 км на паўднёвы захад ад в. Бабровічы Целяханскага сельсавета. Перад вайной у вёсцы жылі 143 чалавекі.
У час карнай аперацыі «Балотная ліхаманка» 15 верасня 1942 г. гітлераўцы загубілі жыхароў (143 чалавекі), разрабавалі маёмасць і спалілі вёску (43 двары).
Пасля вайны не адрадзілася.
Недалёка ад былых вёсак Вяда і Тупічыцы ў памяць аб жыхарах гэтых населеных пунктаў, якія загінулі ў час трагедыі, пастаўлены 2 стэлы.
Вёска Тупічыцы ўвекавечана ў мемарыяльным комплексе «Хатынь».
