ПАРТЫЗАНСКАЯ БРЫГАДА ІМЯ П. К. ПАНАМАРЭНКІ

Партыза́нская брыга́да імя́ П. К. Панамарэ́нкі

Дзейнічала ў гады Вялікай Айчыннай вайны на акупіраванай нямецка-фашысцкімі захопнікамі тэрыторыі Брагінскага, Жлобінскага, Рэчыцкага, Стрэшынскага, Парыцкага і Васілевіцкага раёнаў Гомельскай вобласці.

Створана ў верасні 1943 г. на базе асобнага атрада «Смерць фашызму» (арганізаваны ў кастрычніку 1942), у працэсе фарміравання былі арганізаваны атрады імя Г. К. Жукава і імя М. І. Калініна.

Партызаны атрада «Смерць фашызму» ў снежні 1942 г., студзені — красавіку, чэрвені, кастрычніку 1943 г. удзельнічалі ў баях супраць карнікаў, у разгроме варожых апорных пунктаў у вёсках Мормаль, Таўстыкі, г. п. Стрэшын Стрэшынскага раёна, в. Радуша Жлобінскага раёна, у баях каля в. Лубенікі, пас. Майскі Брагінскага раёна, вёсак Пружынішчы Парыцкага раёна, Новыя Маркавічы Стрэшынскага раёна. У жніўні 1943 г. падарвалі каля 200 рэек.

У кастрычніку 1943 г. партызаны брыгады нападалі на варожыя апорныя пункты, вялі баі з карнікамі, у лістападзе 1943 г. пры набліжэнні часцей Чырвонай арміі разам з партызанскай брыгадай «Жалязняк» Гомельскай вобласці і партызанскім атрадам 108‑м імя Р. І. Катоўскага перарэзалі дарогу Горваль — Шацілкi, вялі засадныя баі, у в. Горваль захапілі больш за 100 варожых аўтамашын (гл. Горвальская аперацыя 1943 г.).

Брыгада злучылася з Чырвонай арміяй 21 лістапада 1943 г., на той момант уключала атрады «Смерць фашызму», імя Г. К. Жукава, імя М. І. Калініна, у якіх налічвалася 938 партызан.

Камандзір брыгады І. І. Бандарэнка, камісар Я. Р. Садавой (Садавы), начальнік штаба К. В. Ніжнікаў.

У гонар атрада «Смерць фашызму» партызанскай брыгады імя П. К. Панамарэнкі каля в. Антонаўка Кароткавіцкага сельсавета Жлобінскага pаёна Гомельскай вобласці ў 1975 г. пастаўлены абеліск.