«БОЛЬШЭВІК»

«Большэві́к» («Бальшавік»)

Газета, заснавана ў красавіку 1935 г. як орган Капаткевіцкага райкама КП(б)‌Б і раённага Савета дэпутатаў працоўных Палескай вобласці (да 25.6.1941).

У час Вялікай Айчыннай вайны з’яўлялася органам Капаткевіцкага падпольнага райкама КП(б)‌Б. Выходзіла ў 1943 г. Вядома 18 нумароў (№ 9–26) за перыяд з 25 мая да 17 лістапада 1943 г. на беларускай мове. Рэдактары: А.-Г. Л. Каплан, I. Р. Ганусевіч (са жніўня 1943).

Пасля вызвалення БССР выдавалася пад той жа назвай. У снежні 1952 г. назва змянілася на «За камунізм». Друкавалася як орган Капаткевіцкага райкама КПБ і раённага Савета дэпутатаў працоўных Палескай (да студзеня 1954) і Гомельскай абласцей. Выданне газеты спынена на № 32 за 21 красавіка 1962 г.