ГАРАДЗЕЦКІ БОЙ 1943 г.

Гарадзе́цкі бой 1943 г.

Бой у Вялікую Айчынную вайну паміж партызанскім палком 425‑м i карным атрадам гітлераўцаў у в. Гарадзец Быхаўскага раёна 30 лістапада 1943 г., аперацыя па выратаванні мірных жыхароў.

Камандаванню партызанскага палка стала вядома, што карнікі занялі в. Гарадзец, жыхароў гэтай i суседніх вёсак (больш за 70 жанчын, старых i дзяцей) зачынілі ў трох хлявах i збіраліся падпаліць ix 1 снежня 1943 г. У раён Гарадца ў 18 гадзін 30 лістапада 1943 г. была паслана разведка, следам за ёй 150 байцоў 1‑га батальёна палка на чале з камбатам П. М. Цагельнікавым хутка i скрытна зрабілі 12‑кіламетровы марш да паўночнай ускраіны Гарадзецкага лесу, дзе ў 23 гадзіны камандаванне батальёна атрымала ад разведчыкаў даныя пра колькасць, размяшчэнне i ўзбраенне гарнізона. Засады былі выстаўлены на дарогах з боку г. Быхаў i в. Залатва Быхаўскага раёна. Дзве штурмавыя партызанскія групы адкрылі кулямётны агонь i закідалі гранатамі будынкі, дзе заселі карнікі. Другая частка партызан, якая трыма групамі вызваліла зачыненых у трох хлявах жыхароў, сустрэла ўпартае супраціўленне ворага i была контратакавана. Завязалася рукапашная схватка, зыход якой вырашыў рэзервовы ўзвод партызан.

Былі знішчаны 66 з 70 карнікаў, мясцовыя жыхары выратаваны. Партызаны страцілі 5 чалавек забітымі i параненымі.