Запо́льскае камсамо́льска-маладзёжнае падпо́лле

Дзейнічала ў час Вялікай Айчыннай вайны ў жніўні 1941 г. — ліпені 1944 г. у в. Заполле Ружанскага раёна (цяпер у Пружанскім раёне) Брэсцкай вобласці пад кіраўніцтвам Ружанскага антыфашысцкага камітэта і Ружанскага падпольнага райкама ЛКСМБ (са жніўня 1943).

Па стане на 1942 г. налічвала 16 чалавек.

Сакратары: Я. I. Гардзей (жнівень 1941 — май 1943), [У. I.] Прадко (чэрвень — жнівень 1943), I. М. Маньчык (жнівень 1943 — ліпень 1944).

Падпольшчыкі здабывалі зброю і боепрыпасы, перадавалі іх партызанам, прымалі па радыё зводкі Саўінфармбюро, распаўсюджвалі лістоўкі, праводзілі дыверсіі. Здабыўшы шрыфты, падпольшчыкі ў 1942 г. абсталявалі друкарню, дзе друкаваліся лістоўкі Брэсцкага міжраённага «Камітэта барацьбы з нямецкімі акупантамі».

У барацьбе з нямецка-фашысцкімі захопнікамі загінулі I. В. Дэйко, А. А. Куніца, I. А. Куніца, [У. I.] Прадко і інш.

У в. Заполле ў гонар падпольшчыкаў у 1975 г. пастаўлены абеліск.