ПАРТЫЗАНСКІ АТРАД 45-ы «ЗА РАДЗІМУ»

Партыза́нскі атра́д 45‑ы «За Радзі́му»

Дзейнічаў у гады Вялікай Айчыннай вайны на акупіраванай нямецка-фашысцкімі захопнікамі тэрыторыі Клімавіцкага і Краснапольскага раёнаў Магілёўскай вобласці.

Створаны ў лістападзе 1942 г.

Партызаны праводзілі аперацыі на чыгуначных лініях Магілёў — Крычаў і Крычаў — Унеча (Расія). У маі — чэрвені 1943 г. падарвалі 11 эшалонаў, 2 чыгуначныя масты, у жніўні — больш за 450 рэек. У ліпені — жніўні 1943 г. вялі баі з ворагам, які спрабаваў прарвацца ў партызанскую зону. Каля в. Шалухоўка Краснапольскага pаёна 23 верасня 1943 г. вялі бой з варожай калонай.

Атрад (504 чалавекі) злучыўся з Чырвонай арміяй 30 верасня 1943 г.

Камандзір атрада У. I. Маркаў; камісары: I. С. Салдаценка, Ф. Ф. Сігаеў; начальнікі штаба: Б. П. Нігіевіч, А. Ф. Канонік.

У гонар атрада ў 1978 г. каля пас. Восаў Краснапольскага раёна Магілёўскай вобласці пастаўлена стэла.