Дата стварэння: 14.04.2023 11:04:58
Дата змены: 11.09.2024 14:12:39
«За пра́ўду»
Акупацыйная газета ў Беларусі ў час Вялікай Айчыннай вайны.
Выдавалася з 24 лютага да 29 чэрвеня 1944 г. у г. Навагрудак Баранавіцкай вобласці на беларускай мове пад кантролем германскіх улад у перыяд акупацыі Беларусі нямецка-фашысцкімі захопнікамі ў час Вялікай Айчыннай вайны. Адказны рэдактар М. В. Рагуля.
Друкавала тэндэнцыйную інфармацыю і каментарыі пра падзеі на франтах Другой сусветнай вайны, распараджэнні акупацыйных улад, пастановы Беларускай цэнтральнай рады, прамовы лідараў беларускіх калабарацыянісцкіх арганізацый; пісала пра дзейнасць Беларускай народнай самапомачы, Саюза беларускай моладзі, барацьбу супраць партызан мясцовых атрадаў паліцыі і 1‑га казацкага палка, які дыслацыраваўся ў Навагрудку. На старонках газеты змешчаны нарысы па гісторыі і этнаграфіі Беларусі (пра Л. Сапегу, гісторыю Нясвіжа, вясельныя звычаі Навагрудчыны і іншыя), вершаваныя і празаічныя творы А. Каханоўскай, Т. Лебяды, А. Чэмера, Я. Шыпшыны і інш.
Выйшла 37 нумароў.
