Стэ́ськава
Вёска Стэськава [згодна з архіўнымі крыніцамі Стэскіна; рус. Стескино (Стеськино, Стэськово)] на тэрыторыі Віцебскага раёна, знішчаная нямецка-фашысцкімі захопнікамі разам з жыхарамі ў час Вялікай Айчыннай вайны.
Знаходзілася за 1–2 км на поўдзень ад в. Храпакі Запольскага сельсавета. Перад вайной у вёсцы жылі 46 чалавек.
У час карнай аперацыі ў ліпені (паводле іншых звестак у снежні) 1942 г. гітлераўцы загубілі 20 жыхароў і спалілі вёску (11 двароў).
Пасля вайны не адрадзілася.
Вёска ўвекавечана ў мемарыяльным комплексе «Хатынь».
