Чарбамы́слы

Вёска на тэрыторыі Полацкага раёна Віцебскай вобласці, знішчаная нямецка-фашысцкімі захопнікамі разам з жыхарамі ў час Вялікай Айчыннай вайны.

Знаходзілася за 5 км ад в. Вялікае Сітна Маласітнянскага сельсавета. Перад вайной у вёсцы жылі 48 чалавек.

У час карнай аперацыі 10 студзеня 1943 г. гітлераўцы загубілі 28 жыхароў і спалілі вёску (15 або 17 двароў).

Пасля вайны не адрадзілася.

На месцы былой вёскі ў 1987 г. устаноўлена мемарыяльная пліта. Вёска ўвекавечана ў мемарыяльным комплексе «Хатынь».