Памятны знак жыхарам пасёлка Капацэвіцкай МТС Сядзіба, загубленым нямецка-фашысцкімі захопнікамі ў час Вялікай Айчыннай вайны. Аграгарадок Новапалескі Салігорскага раёна Мінскай вобласці.
Капацэ́віцкай МТС Сядзі́ба (Сядзіба Капацэвіцкай МТС, Сядзіба)
Пасёлак на тэрыторыі Салігорскага раёна Мінскай вобласці, знішчаны нямецка-фашысцкімі акупантамі разам з жыхарамі ў час Вялікай Айчыннай вайны.
Знаходзіўся ў Капацэвіцкім сельсавеце. Перад вайной у пасёлку жыло 36 сямей, у пачатку 1943 г. — 10 сямей (40 чалавек).
У час карнай аперацыі ў лютым 1943 г. гітлераўцы загубілі 26 жыхароў, разрабавалі і вывезлі маёмасць спалілі пасёлак (14 жылых дамоў, клуб, медпункт, кантору МТС, магазін, школу, 2 майстэрні, 6 гаражоў).
Пасля вайны не адрадзіўся.
Ахвяры нацызму пахаваны на могілках у лесе, астанкі дзвюх сямей — на месцы гібелі.
Пасёлак увекавечаны ў мемарыяльным комплексе «Хатынь». У выданні «Хатынский некрополь: документы и материалы» (Мінск: НАРБ, 2014) пасёлак памылкова названы «Сядзіба Капаткевіцкай МТС»
Непадалёку ад былой сядзібы МТС пасля 1971 г. пабудаваны пасёлак Новапалескі (цяпер аграгарадок) — цэнтр Капацэвіцкага сельсавета.
