Помнік на магіле загубленых гітлераўцамі жыхароў вёскі Круглае Ельскага раёна Гомельскай вобласці.
Кру́глае (Кру́глая)
Вёска на тэрыторыі Ельскага раёна Гомельскай вобласці, знішчаная нямецка-фашысцкімі акупантамі разам з жыхарамі ў час Вялікай Айчыннай вайны.
Знаходзілася за 4 км на паўночны захад ад в. Чэрцень Качышчанскага сельсавета. Перад вайной у вёсцы жылі 47 чалавек.
У час карнай аперацыі 18 ліпеня 1942 г. гітлераўцы загубілі жыхароў (41 чалавека, у т. л. 24 дзіцяці), разрабавалі маёмасць і спалілі вёску (12 двароў).
Пасля вайны не адрадзілася.
На магіле ахвяр фашызму, пахаваных на месцы спаленай вёскі, у 1972 г. пастаўлена стэла з барэльефнымі выявамі галоў старога, жанчыны і дзіцяці.
Вёска ўвекавечана ў мемарыяльным комплексе «Хатынь».
