Лы́чнева

Вёска на тэрыторыі Віцебскага раёна, знішчаная нямецка-фашысцкімі акупантамі разам з жыхарамі ў час Вялікай Айчыннай вайны.

Знаходзілася за 3 км на ўсход ад аграгарадка Тарасенкі Запольскага сельсавета. Перад вайной у вёсцы жылі 185 чалавек.

У час карнай аперацыі ў чэрвені 1942 г. гітлераўцы загубілі 144 жыхары і спалілі вёску (40 двароў).

Пасля вайны не адрадзілася.

На ўшанаванне памяці ахвяр фашызму ў 1988 г. на месцы спаленай вёскі ўстаноўлены мемарыяльны знак.

Вёска ўвекавечана ў мемарыяльным комплексе «Хатынь».