«БОЛЬШЭВІЦКІ ШЛЯХ»

«Большэві́цкі шлях» («Бальшавіцкі шлях»)

Газета, заснавана ў красавіку 1917 г. у г. Полацк пад назвай «Революционный голос» (выданне Полацкага Савета рабочых і салдацкіх дэпутатаў). З 3 студзеня 1918 г. пачала выходзіць аб’яднаная газета «Известия Армейского Совета солдатских депутатов ІІІ Армии и Полоцкого совета рабочих, солдатских и крестьянских депутатов». Было выдадзена 25 нумароў, але ў сувязі з набліжэннем фронту ў лютым 1918 г. газета прыпыніла сваю дзейнасць. Пасля вызвалення горада з лістапада 1918 г. выходзіла пад назвай «Красная газета» і з’яўлялася органам Полацкага павятовага выканаўчага камітэта. Назвы газеты неаднаразова змяняліся («Известия Полоцкого уездного Совета рабочих, крестьянских, батрацких и красноармейских депутатов» са снежня 1918, «Октябрьское эхо» з лістапада 1919, «Красное знамя» са студзеня 1922). Пасля гадавога перапынку з верасня 1924 г. друкавалася пад назвай «Полоцкий пахарь» [выданне Полацкага акружнога камітэта КП(б)‌Б і акружнога выканкама]. З 1926 г. газета ўпершыню пачала выдавацца на беларускай мове пад назвай «Чырвоная Полаччына» [орган Полацкага акружнога камітэта КП(Б)б і акружнога выканаўчага камітэта да 1930, затым — раённага камітэта КП(б)‌Б і раённага выканкама]. Са студзеня 1936 г. па ліпень 1938 г. — «Бальшавік Полаччыны», выданне Полацкага акружнога і раённага камітэтаў КП(б)‌Б і акружнога выканкама. З 1938 г. выходзіла пад назвай «Большэвіцкі шлях» як орган Полацкага райкама КП(б)‌Б і раённага Савета дэпутатаў працоўных Віцебскай вобласці (да 25.6.1941).

У час Вялікай Айчыннай вайны з’яўлялася органам Полацкага падпольнага райкама КП(б)‌Б. З чэрвеня па кастрычнік 1943 г. падпольна выйшла 12 нумароў газеты. Вядома 6 нумароў на беларускай мове: № 1 за 2 чэрвеня, № 4 за 29 чэрвеня, № 8 за 3 верасня, № 9 за 11 верасня, № 10 за 26 верасня, № 12 за 23 кастрычніка. Рэдактар Ф. Т. Шэдаў, намеснік рэдактара П. А. Шадзеўскі.

Газета распаўсюджвалася ў Полацку, нямецкіх гарнізонах, прыгарадных вёсках. Чытачы газеты маглі азнаёміцца з матэрыяламі аб моладзі, лістом воінаў-беларусаў да партызан і партызанак, да ўсяго беларускага народа, даведацца пра іншыя падзеі.

Напярэдадні 26‑й гадавіны Кастрычніцкай рэвалюцыі 1917 г. да выпуску рыхтаваўся святочны нумар, але выпусціць яго не змаглі, паколькі ў партызанскі раён уварваліся нямецкія войскі. Разам з партызанамі супрацоўнікі газеты адышлі за лінію фронту. Рэдакцыя газеты аднавіла сваю работу ў снежні 1943 г. на вызваленай Чырвонай арміяй тэрыторыі Полацкага раёна. У студзені — маі 1944 г. выйшла 19 нумароў, рэдактарам якіх быў П. А. Шадзеўскі.

Пасля вызвалення БССР газета выдавалася пад той жа назвай. З канца 1952 г. выходзіла пад назвай «Сталінскі шлях», з’яўлялася органам Полацкага райкама КПБ і раённага Савета дэпутатаў працоўных. У студзені 1956 г. аб’ядналася з газетай «Сцяг камунізму», што пачала выходзіць у Полацку яшчэ ў верасні 1944 г. пад назвай «Бальшавіцкі сцяг» (да лістапада 1952) як орган Полацкіх абкама і гаркама КПБ, абласнога і гарадскога Саветаў дэпутатаў працоўных, а з лютага 1954 г. (пасля скасавання Полацкай вобласці) — як орган Полацкага гаркама КПБ і гарадскога Савета дэпутатаў працоўных. З 1965 г. газета друкавалася як орган Полацкага райкама і Полацкага гаркама КПБ, раённага і гарадскога Саветаў дэпутатаў працоўных (Саветы народных дэпутатаў з 1977).

З 1991 г. аб’яднаная газета, выходзіць пад назвай «Полацкі веснік» 2 разы на тыдзень на беларускай і рускай мовах. Заснавальнікі — Полацкі раённы і Полацкі гарадскі выканаўчыя камітэты, Полацкі раённы і Полацкі гарадскі Саветы дэпутатаў; з 2014 г. — Полацкі раённы выканаўчы камітэт і Полацкі раённы Савет дэпутатаў.