Дата стварэння: 24.10.2023 09:24:12
Дата змены: 11.09.2024 14:43:24
«За свабо́днае жыццё́»
Газета, заснавана ў верасні 1939 г. як орган Часовага ўпраўлення г. Глыбокае, затым Часовага ўпраўлення Глыбоцкага павета, павятовага камітэта КП(б)Б і выканаўчага камітэта Дзіснянскага павета. У перыяд з 5 лютага 1940 г. да 23 чэрвеня 1941 г. выходзіла як орган Глыбоцкага райкама КП(б)Б і раённага Савета дэпутатаў працоўных Вілейскай вобласці.
У час Вялікай Айчыннай вайны з’яўлялася органам Глыбоцкага падпольнага райкама КП(б)Б. Выходзіла ў друкарні Дунілавіцкага падпольнага райкама КП(б)Б Вілейскай вобласці ў 1944 г. Вядомы 3 нумары: за май (№ 1) і чэрвень (№ 2, 3) 1944 г. на беларускай і рускай (№ 3) мовах.
Пасля вызвалення БССР выдавалася пад той жа назвай. З 20 верасня 1948 г. змяніла назву на «Сцяг камунізма». З мая 1962 г. называлася «Шлях перамогі». З 1965 г. друкавалася як орган Глыбоцкага райкама КПБ і раённага Савета дэпутатаў працоўных (Савет народных дэпутатаў з 1977) Віцебскай вобласці.
З 1991 г. раённая газета, выходзіць пад назвай «Веснік Глыбоччыны» 2 разы на тыдзень на рускай і беларускай мовах. Заснавальнікі — Глыбоцкі раённы выканаўчы камітэт і Глыбоцкі раённы Савет дэпутатаў.