«ЗА СОВЕТСКУЮ БЕЛОРУССИЮ»

«За Сове́тскую Белору́ссию»

Газета, заснавана ў красавіку 1940 г. пад назвай «За высокий урожай» як орган Зэльвенскага райкама КП(б)‌Б і раённага Савета дэпутатаў працоўных Баранавіцкай вобласці.

У час Вялікай Айчыннай вайны з’яўлялася органам Зэльвенскага падпольнага райкама КП(б)‌Б. Выходзіла ў 1943–1944 гг. Вядома 11 нумароў (№ 8–18) за перыяд з 25 сакавіка да 3 чэрвеня 1944 г.

Пасля вызвалення БССР выходзіла пад назвай «Сталинский призыв». З ліпеня 1956 г. мела назву «Путь к коммунизму». З 19 красавіка 1962 г. па снежань 1966 г. адбыўся перапынак у выданні газеты ў сувязі з рэарганізацыяй раёна. З 1967 г. выходзіла пад назвай «Праца». Друкавалася як орган Зэльвенскага райкама КПБ і раённага Савета дэпутатаў працоўных (Савет народных дэпутатаў з 1977) Гродзенскай вобласці.

Раённая газета, выходзіць пад папярэдняй назвай 2 разы на тыдзень на беларускай і рускай мовах. Заснавальнікі — Зэльвенскі раённы выканаўчы камітэт і Зэльвенскі раённы Савет дэпутатаў, рэдакцыя газеты.