СКРЫПШЧЫНА

Скры́пшчына (Скрыпчына)

Вёска на тэрыторыі Верхнядзвінскага раёна Віцебскай вобласці, знішчаная нямецка-фашысцкімі захопнікамі разам з жыхарамі ў час Вялікай Айчыннай вайны.

Знаходзілася за 1,5 км на паўднёвы захад ад в. Рагелева Асвейскага сельсавета. Перад вайной у вёсцы жылі 53 чалавекі.

У час карнай аперацыі ў сакавіку 1943 г. гітлераўцы загубілі 42 жыхары і спалілі вёску (11 двароў).

Пасля вайны не адрадзілася.

На месцы былой вёскі ў 1982 г. насыпаны курган і ўстаноўлена стэла.

Вёска ўвекавечана ў мемарыяльным комплексе «Хатынь».