ХАДЫКА

Хады́ка

Вёска на тэрыторыі Салігорскага раёна Мінскай вобласці, знішчаная нямецка-фашысцкімі захопнікамі разам з жыхарамі ў час Вялікай Айчыннай вайны.

Знаходзілася за 5 км на паўднёвы захад ад в. Загор’е Зажэвіцкага сельсавета. Перад вайной у вёсцы жылі 138 чалавек.

У час карнай аперацыі ў чэрвені 1943 г. гітлераўцы загубілі 136 жыхароў і спалілі вёску (23 двары).

Пасля вайны не адрадзілася.

На месцы трагедыі насыпаны курган, на вяршыні якога пастаўлены абеліск, каля падножжа — стэла.

Вёска ўвекавечана ў мемарыяльным комплексе «Хатынь».