Шчамі́лаўка
Вёска на тэрыторыі Шумілінскага раёна Віцебскай вобласці, знішчаная нямецка-фашысцкімі захопнікамі разам з жыхарамі ў час Вялікай Айчыннай вайны.
Знаходзілася за 5 км ад в. Роўнае Мішневіцкага сельсавета. Перад вайной у вёсцы жыў 31 чалавек.
У час карнай аперацыі ў сакавіку 1943 г. гітлераўцы загубілі 23 жыхары і спалілі вёску (6 двароў).
Пасля вайны не адрадзілася.
На месцы, дзе раней знаходзілася Шчамілаўка, у 1969 г. устаноўлена стэла.
Вёска ўвекавечана ў мемарыяльным комплексе «Хатынь».