Дата стварэння: 02.11.2023 16:38:58
Дата змены: 21.08.2025 11:12:14
Партыза́нская брыга́да До́брушская імя́ I. В. Ста́ліна
Дзейнічала ў гады Вялікай Айчыннай вайны на акупіраванай нямецка-фашысцкімі захопнікамі тэрыторыі Добрушскага, Веткаўскага і Церахоўскага раёнаў Гомельскай вобласці.
Створана ў ліпені 1943 г. на базе атрада імя В. М. Молатава (арганізаваны ў маі 1943); пры фарміраванні брыгады з яго часткі арганізаваны атрад імя С. М. Будзённага.
Партызаны праводзілі дыверсіі на чыгунках Гомель — Бранск, Гомель — Жлобін, Гомель — Бахмач. У жніўні і верасні 1943 г. удзельнічалі ў баях за ўтрыманне партызанскай зоны і выхад з акружэння падчас карных аперацый. У верасні 1943 г. з часцямі Чырвонай арміі ўдзельнічалі ў вызваленні тэрыторыі Добрушскага раёна.
Брыгада злучылася з Чырвонай арміяй 27 верасня 1943 г., на той момант уключала атрады імя В. М. Молатава і імя С. М. Будзённага, у якіх налічваўся 771 партызан.
Камандзір брыгады I. П. Крывенчанка, камісар I. М. Гатальскі, начальнік штаба П. Ф. Захараў.
Ф. Я. Кухараву — камандзіру дыверсійнай групы атрада імя В. М. Молатава — прысвоена званне Героя Савецкага Саюза.
У Добрушскім раёне ў гонар брыгады ў в. Харошаўка ў 1977 г. і ў пас. Уборак у 1980 г. пастаўлены стэлы.
