Мемарыяльны комплекс ахвярам Маладзечанскага лагера смерці.
Маладзе́чанскі ла́гер сме́рці
Шталаг № 342.
Створаны нямецка-фашысцкімі акупантамі ў ліпені 1941 г. у час Вялікай Айчыннай вайны на ўскраіне г. Маладзечна (3 лагеры, 13 аддзяленняў на чыгуначных лініях) для масавай загубы савецкіх ваеннапалонных; у 1941 г. тут трымалі і цывільнае насельніцтва; пастаянна знаходзілася каля 30 тыс. чалавек.
Лагер быў абгароджаны калючым дротам. Вязні размяшчаліся ў бараках без ацяплення, за суткі атрымлівалі на чалавека 100 г эрзац-хлеба і 1 л малапажыўнай поліўкі (баланды). Ад фізічнага знясілення, голаду, эпідэміі тыфу і іншых хвароб пачалася масавая смяротнасць. Сістэматычна праводзіліся расстрэлы вязняў.
Да чэрвеня 1944 г. у лагеры было загублена 33 150 чалавек.
У 1996 г. на месцы Маладзечанскага лагера смерці адкрыты мемарыяльны комплекс.
