МЕТАСЕКВОЯ

Метасекво́я (Metasequoia Hu et W.C. Cheng), род голанасенных хвойных раслін сямейства Кіпарысавыя.

Уключае адзін сучасны рэліктавы від — метасеквоя гліптастробусападобная, або кітайская (Metasequoia glyptostroboides Hu et W.C. Cheng), які распаўсюджаны ў гарах Цэнтральнага Кітая. Шырока культывуецца ў іншых рэгіёнах зямнога шара.

У Беларусі вырошчваецца рэдка, пераважна на поўдні рэспублікі. Мае некалькі сартоў, якія адрозніваюцца формай кроны, памерамі і афарбоўкай лісця.

Буйныя лістападныя (галінападныя) аднадомныя дрэвы вышынёй да 40 (45) м і дыяметрам ствала да 2,5 м. Працягласць жыцця да 300–450 (600) гадоў. Крона рыхлая, канічная, часта мнагаствольная. Парасткі падоўжаныя і пакарочаныя. Пакарочаныя парасткі да 8 см даўжынёй, плоскія. Лісце супраціўнае, простае, суцэльнае, суцэльнакраёвае, лінейнае, даўжынёй да 2,5 см, мяккае, жаўцее і ападае восенню разам з пакарочаным парасткам. Пыленне ў сакавіку — красавіку да распускання лісця. Мужчынскія шышкі дробныя, прадаўгаватыя, да 3–6 мм у даўжыню, жаўтаватыя, сабраны ў мяцёлкападобныя або гронкападобныя зборы. Спелыя жаночыя шышкі адзінкавыя, акруглыя, да 25 мм у дыяметры, з 8–14 парамі супраціўных лускавінак, спачатку зялёныя, крыху мясістыя, з шызым налётам, пры выспяванні бурыя, на доўгіх паніклых ножках, спеюць восенню ў год апылення. Пасля выспявання ападаюць цалкам. Насенне плоскае, крылатае.

Святлалюбная, умерана зімаўстойлівая, да глебы малапатрабавальная, але аддае перавагу вільготнай і добра дрэніраванай. Даволі ўстойлівая да гарадскіх умоў, параўнальна лёгка размнажаецца чаранкаваннем.

Драўніна трывалая, устойлівая да гніення, прымяняецца ў будаўніцтве, лесаразвядзенні. Каштоўная хуткарослая дэкаратыўная расліна.