Ве́рхняе Сту́нжава
Вёска на тэрыторыі Верхнядзвінскага раёна Віцебскай вобласці, знішчаная нямецка-фашысцкімі акупантамі разам з жыхарамі ў час Вялікай Айчыннай вайны.
Знаходзілася за 2 км на паўднёвы захад ад аграгарадка Сар’я Сар’янскага сельсавета. Перад вайной у вёсцы жылі 69 чалавек.
У час карнай аперацыі «Зімовае чараўніцтва» ў лютым 1943 г. гітлераўцы загубілі 58 жыхароў і спалілі вёску (14 двароў).
Пасля вайны не адрадзілася.
На месцы вёскі ў 1982 г. насыпаны курган, на яго вяршыні пастаўлены абеліск. Вёска ўвекавечана ў мемарыяльным комплексе «Хатынь».
