Помнік на месцы знішчанай гітлераўцамі разам з жыхарамі вёскі Вянкелева Верхнядзвінскага раёна Віцебскай вобласці.
Вянке́лева (Вя́нкелева, Вількялё́ва, Венкялё́ва)
Вёска на тэрыторыі Верхнядзвінскага pаёна Віцебскай вобласці, знішчаная нямецка-фашысцкімі акупантамі разам з жыхарамі ў час Вялікай Айчыннай вайны.
Знаходзілася за 4 км на паўночны захад ад в. Задзежжа Каханавіцкага сельсавета. Перад вайной у вёсцы жылі 64 чалавекі.
У час карнай аперацыі «Зімовае чараўніцтва» ў лютым 1943 г. гітлераўцы загубілі 48 жыхароў і спалілі вёску (14 двароў).
Пасля вайны не адрадзілася.
На месцы вёскі ў 1982 г. насыпаны курган, на яго вяршыні пастаўлена стэла. Вёска ўвекавечана ў мемарыяльным комплексе «Хатынь».
