Е́ськава

Вёска на тэрыторыі Верхнядзвінскага раёна Віцебскай вобласці, знішчаная нямецка-фашысцкімі акупантамі разам з жыхарамі ў час Вялікай Айчыннай вайны.

Знаходзілася за 1 км на паўднёвы захад ад аграгарадка Каханавічы Каханавіцкага сельсавета. Перад вайной у вёсцы жылі 80 чалавек.

У час карнай аперацыі «Зімовае чараўніцтва» ў лютым 1943 г. гітлераўцы загубілі 52 жыхары і спалілі вёску (22 двары).

Пасля вайны не адрадзілася.

На месцы вёскі ў 1982 г. насыпаны курган, на яго вяршыні пастаўлена стэла.

Вёска ўвекавечана ў мемарыяльным комплексе «Хатынь».