Курган і памятная стэла на месцы былой вёскі Жалабоўшчына Верхнядзвінскага раёна Віцебскай вобласці, знішчанай разам з жыхарамі нямецка-фашысцкімі захопнікамі ў час Вялікай Айчыннай вайны.
Жалабо́ўшчына
Вёска на тэрыторыі Верхнядзвінскага раёна Віцебскай вобласці, знішчаная нямецка-фашысцкімі захопнікамі разам з жыхарамі ў час Вялікай Айчыннай вайны.
Знаходзілася за 3 км на поўдзень ад в. Мотужы Асвейскага сельсавета. Перад вайной у вёсцы жылі 49 чалавек.
У час карнай аперацыі «Зімовае чараўніцтва» ў лютым 1943 г. гітлераўцы загубілі 36 жыхароў і спалілі вёску (12 двароў).
Пасля вайны не адрадзілася.
На месцы вёскі ў 1975 г. насыпаны курган, на яго вяршыні пастаўлена стэла.
Вёска ўвекавечана ў мемарыяльным комплексе «Хатынь».
