Помнік на месцы знішчанай гітлераўцамі вёскі Красніца Івацэвіцкага раёна Брэсцкай вобласці.
Красні́ца
Вёска на тэрыторыі Івацэвіцкага раёна Брэсцкай вобласці, знішчаная нямецка-фашысцкімі акупантамі разам з жыхарамі ў час Вялікай Айчыннай вайны.
Знаходзілася за 3 км на захад ад в. Выганашчы Целяханскага сельсавета. Перад вайной у вёсцы жыло больш за 90 чалавек.
У час карнай аперацыі «Балотная ліхаманка» 10 верасня 1942 г. гітлераўцы загубілі 90 жыхароў, маёмасць разрабавалі, жывёлу забралі, вёску (16 двароў) спалілі.
Пасля вайны не адрадзілася.
На месцы вёскі ў 1950 г. пастаўлены абеліск.
Вёска ўвекавечана ў мемарыяльным комплексе «Хатынь».
