Пустэ́льнікі
Вёска на тэрыторыі Верхнядзвінскага раёна Віцебскай вобласці, знішчаная нямецка-фашысцкімі захопнікамі разам з жыхарамі ў час Вялікай Айчыннай вайны.
Знаходзілася за 2 км на паўднёвы захад ад в. Мотужы Асвейскага сельсавета. Перад вайной у вёсцы жылі 84 чалавекі.
У час карнай аперацыі «Зімовае чараўніцтва» ў лютым 1943 г. гітлераўцы загубілі 57 жыхароў і спалілі вёску (21 двор).
Пасля вайны не адрадзілася.
На месцы вёскі ў 1975 г. насыпаны курган, на вяршыні якога ўстаноўлена стэла.
Вёска ўвекавечана ў мемарыяльным комплексе «Хатынь».
