«БОЛЬШЭВІЦКАЯ ТРЫБУНА»

«Большэві́цкая трыбу́на» («Бальшавіцкая трыбуна»)

Газета, заснавана ў 1918 г. пад назвай «Известия исполкома». Назва выдання неаднаразова змянялася («Факел» з 1919, «Камунар» з 1931). З 1938 г. мела назву «Большэвіцкая трыбуна». Орган Сенненскага райкама КП(б)‌Б і раённага Савета дэпутатаў працоўных Віцебскай вобласці (сакавік 1931 — 26.6.1941).

У час Вялікай Айчыннай вайны з’яўлялася органам Сенненскага падпольнага райкама КП(б)‌Б і партызанскай брыгады Сенненскай. Выходзіла ў 1943–1944 гг. з перыядычнасцю адзін раз на тыдзень. Вядома 35 нумароў (№ 1, 2, 5–19 за 1943; № 1–3, 5–16, 18–20 за 1944) за перыяд з 28 чэрвеня 1943 г. да 14 мая 1944 г. на беларускай (загаловак) і рускай (тэкст) мовах. Рэдактары: К. А. Пашкевіч, А. Н. Салоха (са студзеня 1944).

Пасля вызвалення БССР выдавалася пад той жа назвай. У снежні 1952 г. назва змянілася на «Шлях да камунізма». З сакавіка 1963 г., пасля перапынку ў выданні, называлася «Ленінская іскра». З 1965 г. друкавалася як орган Сенненскага райкама КПБ і раённага Савета дэпутатаў працоўных (Савет народных дэпутатаў з 1977).

З 1991 г. раённая газета, выходзіць пад назвай «Голос Сенненщины» 2 разы на тыдзень на беларускай і рускай мовах. Заснавальнікі — Сенненскі раённы выканаўчы камітэт, Сенненскі раённы Савет дэпутатаў.