«АЛЬТОНА»

«Альто́на» (Аltоnа — прыгарад г. Гамбург у Германіі)

Кодавая назва карнай аперацыі нямецка-фашысцкіх захопнікаў у час Вялікай Айчыннай вайны супраць мясцовага насельніцтва і партызан, якія вырваліся з акружэння ў ходзе карнай аперацыі «Гамбург».

Праводзілася ў 2‑й палове снежня 1942 г. у Навамышскім, Быценскім і Ляхавіцкім раёнах Баранавіцкай вобласці, Целяханскім і Ганцавіцкім раёнах Пінскай вобласці сіламі 14‑га паліцэйскага палка СС, спецыяльнымі камандамі паліцыі бяспекі і СД, іншымі карнымі баявымі групамі.

Карнікі праследавалі партызан у кірунку Налібоцкай пушчы, адціскалі на ўсход і поўдзень, у раён Косава — Быцень. У загадзе групенфюрара СС генерал-лейтэнанта паліцыі К. фон Готберга ўказвалася: «Праз стараст і іншых падыходзячых асоб устанавіць асоб, якія спачуваюць партызанам, а таксама іншых падазроных асоб і знішчаць іх, як яўрэяў і цыган. Асобныя падраздзяленні... маюць права бязлітасна распраўляцца з асобамі і вёскамі, якія прыхільна ставяцца да ворага». На працягу тыдня гітлераўцы беспаспяхова спрабавалі акружыць і знішчыць партызан, а потым учынілі крывавую расправу над мірнымі жыхарамі.

Усяго ў ходзе карнай аперацыі «Альтона» гітлераўцы расстралялі і спалілі жывымі больш за тысячу дзяцей, жанчын і старых.