ВІЛЕЙСКІ ПАДПОЛЬНЫ ГАРКАМ КП(б)‌Б

Віле́йскі падпо́льны гарка́м КП(б)‌Б

Вілейскі падпольны гарадскі камітэт КП(б)‌Б.

Дзейнічаў у гады Вялікай Айчыннай вайны ў акупіраваным нямецка-фашысцкімі захопнікамі г. Вілейка.

Створаны 12 красавіка 1944 г. рашэннем Вілейскага падпольнага абкама КП(б)‌Б.

Да стварэння падпольнага гаркама КП(б)‌Б барацьбу насельніцтва супраць нямецка-фашысцкіх захопнікаў у горадзе ўзначальваў А. І. Валынец, які 17 кастрычніка 1943 г. быў зацверджаны ўпаўнаважаным Вілейскага падпольнага абкама КП(б)‌Б па г. Вілейка.

Падпольны гаркам умацоўваў дзеючыя і ствараў новыя падпольныя арганізацыі і групы, праводзіў палітыка-масавую работу сярод жыхароў Вілейкі і навакольных населеных пунктаў. Узначальваў Вілейска-Куранецкае партыйна-камсамольскае падполле. Накіроўваў дзейнасць Вілейскага падпольнага гаркама ЛКСМБ.

Базіраваўся ў партызанскай брыгадзе «За Савецкую Беларусь» (Вілейскай вобласці).

Друкаванага органа не меў.

Спыніў сваю дзейнасць 2 ліпеня 1944 г.

Сакратар гаркама К. I. Кавалёва; члены гаркама: А. I. Валынец [адначасова камандзір партызанскай брыгады «За Савецкую Беларусь» і ўпаўнаважаны Вілейскага падпольнага абкама КП(б)‌Б па г. Вілейка], П. I. Голаў.

У гонар Вілейскіх падпольных гаркамаў КП(б)‌Б і ЛКСМБ, Куранецкіх падпольных райкамаў КП(б)‌Б і ЛКСМБ, партызанскіх брыгад імя Л. М. Даватара і «За Савецкую Беларусь» на месцы іх базіравання недалёка ад в. Ляскі Вілейскага раёна ў 1970 г. пастаўлены помнік і адноўлены партызанскія зямлянкі.