ГОМЕЛЬСКІ ПАДПОЛЬНЫ ГАРКАМ ЛКСМБ

Го́мельскі падпо́льны гарка́м ЛКСМБ

Гомельскі падпольны гарадскі камітэт ЛКСМБ.

Дзейнічаў у гады Вялікай Айчыннай вайны ў акупіраваным нямецка-фашысцкімі захопнікамі г. Гомель.

Створаны 22 жніўня 1941 г., працаваў пад кіраўніцтвам Гомельскага падпольнага абкама ЛКСМБ і Гомельскага падпольнага гаркама КП(б)‌Б.

У тыле ворага для арганізацыі падпольнай работы з даваеннага складу гаркама камсамола былі пакінуты сакратар гаркама А. Л. Ісачанка, член бюро гаркама С. П. Купцоў і член гаркама Ф. П. Котчанка.

Падпольны гаркам кіраваў камсамольска-маладзёжнымі падпольнымі арганізацыямі і групамі Гомеля (гл. Гомельскае камсамольска-маладзёжнае падполле). Асноўная база знаходзілася ў партызанскім атрадзе «Бальшавік» (у кастрычніку 1943 разгорнуты ў партызанскую брыгаду «Бальшавік» Гомельскай вобласці). Пасля гібелі А. Л. Ісачанкі абавязкі сакратара падпольнага гаркама выконваў С. П. Купцоў, у маі — чэрвені 1943 г. склад гаркама быў пашыраны.

Друкаванага органа не меў.

Спыніў сваю дзейнасць 26 лістапада 1943 г.

Сакратары гаркама: А. Л. Ісачанка (да 8.10.1942, загінуў), С. П. Купцоў (з 10.5.1943, выконваў абавязкі сакратара з кастрычніка 1942); члены гаркама: С. П. Купцоў, Ф. П. Котчанка, В. I. Блескіна (з 10.5.1943), Ф. І Аксёнаў, К. Л. Данілін (абодва з 1.6.1943).