«РЭГАТА»

«Рэга́та» («Regatta»)

Кодавая назва карнай аперацыі нямецка-фашысцкіх захопнікаў супраць партызанскай брыгады «Звязда», двух атрадаў партызанскай брыгады «Чэкіст» і мясцовага насельніцтва ў Горацкім і Дрыбінскім раёнах Магілёўскай вобласці 4–7 кастрычніка 1942 г. у час Вялікай Айчыннай вайны.

Праводзілася 36‑м ахоўным палком, ciламі вышэйшага кіраўніка СС і паліцыі ў Цэнтральнай Расіі і Беларусі, у т. л. батальёнам 14‑га паліцэйскага палка, мінамётнымі, танкавымі ротамі, ротай сувязі, паліцэйскім батальёнам «Поўнач», асобым батальёнам СС О. Дырлевангера, спецыяльнымі сапёрнымі падраздзяленнямі.

Карнікі блакіравалі ўсе лясныя масівы і населеныя пункты на захад ад в. Дрыбін і на паўночны захад ад г. Горкі. Партызанам і частцы мясцовых жыхароў удалося вырвацца з блакады.

Гітлераўцы загубілі шмат жыхароў, разрабавалі і спалілі вёскі, забралі жывёлу. У вёсках Добрая, Машкова, Рэкатка Горацкага раёна імі былі пакінуты паліцэйскія падраздзяленні.