УХЛЯСЦЬ

У́хлясць

Іншая назва: Вухлясць.

Рака ў Быхаўскім раёне Магілёўскай вобласці. Даўжыня 48 км.

Левы прыток ракі Дняпро. Асноўны прыток — рака Варонінка (справа).

Плошча вадазбору 478 км². Сярэднегадавы расход вады ў вусці 2,6 м³/с. Сярэдні ўхіл воднай паверхні 0,5 ‰.

Пачынаецца з меліярацыйнай канавы за 2 км на паўночны захад ад вёскі Ляжанка. Цячэ пераважна па Аршанска-Магілёўскай раўніне.

Рэчышча каналізаванае на ўсім працягу, у 1998 г. праведзена паўторнае паглыбленне паміж вёскамі Трылесіна і Дабу́жа.

На перыяд веснавога разводдзя прыпадае 55 % гадавога сцёку. Замярзае ў пачатку снежня, крыгаход у канцы сакавіка (у сярэднім 6 сутак).