КУТАЎШЧЫНСКАЕ

Ку́таўшчынскае

Іншыя назвы: Кутаўшчына, Лізараўскае.

Вадасховішча ў Баранавіцкім раёне Брэсцкай вобласці. Размешчана на рацэ Сэрвач, за 20 км на поўнач ад горада Баранавічы.

Пабудавана ў 1950 г.

Плошча 1 км², даўжыня 5 км, максімальная шырыня 0,4 км, максімальная глыбіня 5 м. Аб’ём вады 1,35 млн м³.

Плошча вадазбору 124 км². Вадазбор узгорысты (разаранасць 50 %, залесенасць 10 %, забалочанасць 8 %). Сярэдні гадавы сцёк 23 млн м³. Моцнапраточнае.

Водзяцца шчупак, карась сярэбраны і залаты, плотка, карп, лінь, акунь. Рэчышчавае, перыядычна выкарыстоўваецца для сутачнага рэгулявання.

Збудаванні гідравузла: плаціна (даўжыня 430 м, максімальная вышыня 9,2 м), земляная дамба (даўжыня 266 м), вадаскід.

Выкарыстоўваецца для рэкрэацыі, аматарскага рыбалоўства.