Анто́паль

Гарадскі пасёлак у Драгічынскім раёне Брэсцкай вобласці. За 28 км на захад ад г. Драгічын, за 127 км ад г. Брэст, за 281 км ад Мінска, за 7 км ад чыгуначнай станцыі Гарадзец (на лініі Брэст — Пінск); на аўтадарозе Кобрын — Драгічын.

Да 1931 г. мястэчка, у 1931–1940 гг. горад.

У 1940–1959 гг. цэнтр Антопальскага раёна.

У 1940 г. у Антопалі было 3 325 жыхароў.

У гады Вялікай Айчыннай вайны

Антопаль акупіраваны 25 чэрвеня 1941 г. Нямецка-фашысцкія захопнікі ў пасёлку і раёне загубілі 4 390 чалавек, у т. л. у кастрычніку 1942 г. 2,5 тыс. вязняў гета ў Антопалі.

На тэрыторыі раёна дзейнічалі Антопальскі падпольны райкам КП(б)‌Б і Антопальскі падпольны райкам ЛКСМБ, партызанская брыгада імя Я. М. Свярдлова, партызанскі атрад імя Р. І. Катоўскага (першага складу), партызанскі атрад імя Р. І. Катоўскага (другога складу), партызанскі атрад імя С. М. Кірава (Брэсцкай вобласці), партызанская група «Іскра».

Антопаль вызвалены 16 ліпеня 1944 г. часцямі 12‑й гвардзейскай стралковай дывізіі (генерал-маёр Д. К. Малькоў) 9‑га гвардзейскага стралковага корпуса 61‑й арміі 1‑га Беларускага фронту ў ходзе Беларускай аперацыі 1944 г.

У Антопалі знаходзяцца:

• брацкая магіла савецкіх воінаў і паўстанцаў, якія загінулі ў 1939 г.; 

• брацкая магіла савецкіх воінаў і партызан, што загінулі ў 1944 г.; 

• магіла ахвяр фашызму — вязняў гета (за 1 км на ўсход ад Антопаля ва ўрочышчы Хвойнікі); 

• на магілах пастаўлены помнікі.