Астраве́ц

Горад, цэнтр Астравецкага раёна Гродзенскай вобласці, на р. Лоша. За 202 км на паўночны ўсход ад г. Гродна, за 149 км ад Мінска, за 5 км ад чыгуначнай станцыі Гудагай (на лініі Маладзечна — Вільнюс); аўтадарогай звязаны з г. Ашмяны.

Да 1958 г. вёска.

У 1958–2012 гг. гарадскі пасёлак.

У 1938 г. у Астраўцы было 580 жыхароў.

У гады Вялікай Айчыннай вайны

Астравец акупіраваны 27 чэрвеня 1941 г. Нямецка-фашысцкія захопнікі загубілі ў вёсцы і раёне 541 мясцовага жыхара. У шэрагу населеных пунктаў, у т. л. Астраўцы, былі створаны гета. Большасць вязняў вывезена і знішчана ў Панарах каля Вільнюса (Літва).

На тэрыторыі раёна дзейнічалі Астравецкі падпольны райкам КП(б)‌Б і Астравецкі падпольны райкам ЛКСМБ; партызанская брыгада імя М. Ф. Гастэлы, партызанская брыгада імя К. Я. Варашылава (Вілейскай вобласці) і партызанская брыгада імя ЦК КП(б)‌Б.

Астравец вызвалены 3 ліпеня 1944 г. партызанамі брыгады імя ЦК КП(б)‌Б (камандзір М. I. Фёдараў) і ўтрымліваўся імі па 6 ліпеня 1944 г. да падыходу войск 3‑га Беларускага фронту, якія праводзілі Вільнюскую аперацыю 1944 г.

У Астраўцы знаходзяцца:

• помнік землякам — савецкім воінам і партызанам, якія загінулі ў гады Вялікай Айчыннай вайны;

• мемарыяльная дошка ў гонар партызанскай брыгады імя ЦК КП(б)‌Б.