НАРАЎ

На́раў

Рака ў Пружанскім раёне Брэсцкай вобласці, Свіслацкім раёне Гродзенскай вобласці Беларусі і ў Польшчы. Даўжыня 497 км (у межах Беларусі 44 км).

Правы прыток ракі Заходні Буг. Асноўныя прытокі ў Беларусі: Рудаўка (правы), Тушамлянка, Нямержанка (левыя).

Пачынаецца ў вярхоўі канала Скаронаў у Свіслацкім раёне за 6 км на паўночны ўсход ад вёскі Клепачы Пружанскага раёна. Вусце на тэрыторыі Польшчы. У Беларусі працякае па Прыбугскай раўніне па тэрыторыі Нацыянальнага парку «Белавежская пушча».

Плошча вадазбору 74 800 км². Сярэднегадавы расход вады ў вусці 199 м³/с, у межах Беларусі 5 м³/с (з прытокамі, якія пачынаюцца на Беларусі і ўпадаюць у Нараў на тэрыторыі Польшчы). Сярэдні ўхіл воднай паверхні 0,3 ‰. Лясістасць тэрыторыі вадазбору 35 %.

Даліна ў межах Беларусі амаль на ўсім працягу невыразная.

Рэчышча каналізаванае на працягу 9 км (ад вытоку да вусця канала Матылёў Роў), на астатнім участку звілістае, месцамі выпрастанае.

Шырыня ракі ў межань 8–10 м.

На перыяд вясновага разводдзя прыпадае каля 48 % аб’ёму гадавога сцёку.

Замярзае ў першай дэкадзе снежня, ускрыццё ў сярэдзіне сакавіка.