ТЭКЛІЦ

Тэ́кліц

Возера ў Лепельскім раёне Віцебскай вобласці.

Размешчана ў басейне ракі Сергуч (выцякае з возера), за 13 км на паўночны захад ад горада Лепель, каля вёскі Звязда.

Упадаюць 2 ручаі ( у т. л. з возера Луконец).

Плошча 2,02 км², даўжыня 1,99 км, максімальная шырыня 1,29 км, максімальная глыбіня 3,2 м. Аб’ём вады 4,14 млн м³. Празрыстасць да 2 м. Берагавая лінія слабазвілістая, даўжынёй 5,5 км. Плошча вадазбору 32,9 км².

Катлавіна рэшткавага тыпу, авальнай формы, выцягнутая з поўначы на поўдзень.

Схілы вышынёй 3–8 м, спадзістыя, пад лесам; на ўсходзе вышынёй 10–12 м, умерана стромкія, дзе-нідзе разараныя.

Берагі пераважна нізкія, пясчаныя, месцамі забалочаныя, пад лесам і хмызняком, на поўначы багністыя, зарослыя балотнай расліннасцю (дрыгва, сплавіна).

Дно плоскае, выслана сапрапелем, уздоўж берагоў да глыбіні 0,5 м — пясчанае.

Моцна зарастае.

Шырыня паласы надводнай расліннасці да 170 м.

Водзяцца шчупак, плотка, карась залаты, лінь, акунь.