ДУХАТА

Духата́

Іншая назва: задуха.

Спалучэнне досыць высокай тэмпературы паветра з высокай адноснай вільготнасцю паветра.

За ніжнюю мяжу духаты прымаюцца:

• тэмпература паветра 21 °С і адносная вільготнасць 75 %;

• 23 °С і 70 %;

• 28 °С і 50 %;

• 30 °С і 45 %.

У Беларусі такія спалучэнні назіраюцца часцей за ўсё ў чэрвені — жніўні (за год бывае 3–5 задушлівых дзён на поўначы і 5–7 на поўдні), асабліва ў 2‑й палове дня (17:00–20:00).

Мае лакальнае распаўсюджванне: у замкнёных катлавінах, паніжэннях, на балотах, у западзінах, на лясных палянах, у вялікіх гарадах.

У Мінску такіх дзён у чэрвені ў сярэднім 1,7, у ліпені — 3,1, у жніўні — 2,5; максімальна — 17 (ліпень 1972).

Духата істотна ўплывае на фізіялагічны стан чалавека. Душнае надвор’е паніжае працаздольнасць, парушае цеплаабмен арганізма, адмоўна ўздзейнічае на людзей з сардэчна-сасудзістымі захворваннямі.