ЗАЛЬВЯНКА

Зальвя́нка

Рака ў Пружанскім раёне Брэсцкай вобласці і ў Ваўкавыскім, Зэльвенскім, Мастоўскім і Свіслацкім раёнах Гродзенскай вобласці. Даўжыня 170 км.

Левы прыток ракі Нёман. Асноўныя прытокі: Шчыба, Ружанка, Іванаўка (правыя), Сасва, Самараўка, Юхнаўка (левыя).

Пачынаецца паміж вёскамі Лідзяны і Кулявічы Свіслацкага раёна.

Плошча вадазбору 1 940 км². Сярэднегадавы расход вады ў вусці 11 м³/с.

Даліна трапецападобная, шырыня ў ніжнім цячэнні ад 0,5 да 3–4 км.

Рэчышча моцна звілістае, шырыня ў межань 15–20 м; каналізавана на двух участках агульнай працягласцю 36,9 км (у 1968 і 1974 ад вытоку да вёскі Краскі Ваўкавыскага раёна, 16 км; у 1979–2 км на поўнач ад гарадскога пасёлка Зэльва — 2 км на поўнач ад вёскі Ліхінічы, 20,9 км).

Берагі пясчаныя, стромкія і абрывістыя.

Замярзае ў 3‑й дэкадзе снежня, лёд трымаецца да сярэдзіны сакавіка.

Максімальны ўзровень разводдзя ў ніжнім цячэнні ў пачатку 3‑й дэкады сакавіка.

Водзяцца шчупак, гусцяра, верхаводка, ялец, плотка, мянтуз, акунь, ёрш; выдра, андатра, норка.

На рацэ размешчаны: горад Масты, гарадскі пасёлак Зэльва. На рацэ вадасховішчы Зэльвенскае і Паперня.