ДОБАСНА

До́басна

Іншыя назвы: Дабасна́, До́бысна.

Рака ў Кіраўскім раёне Магілёўскай вобласці, Рагачоўскім і Жлобінскім раёнах Гомельскай вобласці. Даўжыня 81 км.

Правы прыток ракі Дняпро. Асноўныя прытокі — рэкі Беліца (левы) і Язнач (правы). На рацэ знаходзіцца вадасховішча Добасна.

Плошча вадазбору 874 км². Сярэднегадавы расход вады ў вусці 4 м³/с. Сярэдні ўхіл воднай паверхні 0,6 ‰.

Пачынаецца каля пасёлка Скачок Кіраўскага раёна, вусце на паўднёвай ускраіне горада Жлобін.

Цячэ ў межах паўднёвай часткі Гомельскага Палесся.

Даліна ў верхнім цячэнні невыразная, ніжэй трапецападобная, шырынёй 700⁠–⁠900 м.

Схілы слабапаздзеленыя, спадзістыя, месцамі ўмерана стромкія, вышынёй 6⁠–⁠10 м, пясчаныя і супясчаныя, пераважна пад раллёй.

Пойма двухбаковая, шырынёй 200⁠–⁠300 м. На перыяд веснавога разводдзя прыпадае да 55 % гадавога сцёку. Максімальны ўзровень разводдзя ў пачатку 3‑й дэкады сакавіка, сярэдняя вышыня над межанным узроўнем 1,8 м (у ніжнім цячэнні).

Замярзае ў сярэдзіне снежня, крыгалом у 3‑й дэкадзе сакавіка. Вясновы крыгаход 3–5 сутак.

Рэчышча шырынёй 5–15 м, каналізаванае ў 1963 г., 1968–1975 гг. на працягу 69,9 км (ад вытоку да вёскі Гарбачоўка, 51,4 км; ад вёскі Краснабярэжская Слабодка Жлобінскага раёна да чыгункі Калінкавічы — Жлобін, 18,5 км); у 2000 г. праведзена паўторнае паглыбленне і пашырэнне на ўчастку ад вёскі Пархімкаўская Слабада да вёскі Вялікія Філіпкавічы Рагачоўскага раёна (2,4 км).

Рэжым ракі вывучаўся ў 1931–1941 гг., назіранні вядуцца на гідралагічным пасту вёскі Малевіцкая Рудня Жлобінскага раёна.