Па стане на 2022 г. у Беларусі створаны 153 вадасховішчы з агульнай плошчай люстэрка 822 км² (0,5 % плошчы краіны). З агульнай колькасці 85 вадасховішч маюць плошчу больш за 1 км². Найбольшая колькасць вадасховішч знаходзіцца ў басейнах рэк Прыпяць (55) і Днепр (47), найменшая — у басейнах рэк Заходні Буг (11) і Вілія (5); у басейнах рэк Заходняя Дзвіна і Нёман іх 17 і 18 адпаведна (belgidromet.by).

Пераважаюць вадасховішчы рэчышчавага (рачнога) тыпу (52 %). Характарыстыка найбольш значных з іх прадстаўлена ў табліцы 2.

На долю вадасховішч наліўнога і азёрнага тыпаў даводзіцца 35 і 13 % адпаведна. Прычым асноўная частка азёрных вадасховішч сканцэнтравана ў межах Віцебскай вобласці, наліўных — у Брэсцкай вобласці. Прыклады азёрных вадасховішч: Пагост (у басейне р. Бобрык), Чорнае (у басейне р. Ясельда).

Самы буйны штучны вадаём у Беларусі — Вілейскае вадасховішча, якое знаходзіцца ў басейне р. Вілія. Яно з’яўляецца асноўным гідратэхнічным збудаваннем Вілейска-Мінскай воднай сістэмы, яго галоўнае прызначэнне — рэгуляванне сцёку і абвадненне р. Свіслач. У структуру Вілейска-Мінскай воднай сістэмы таксама ўваходзяць яшчэ 13 вадасховішч, найбольш значныя з якіх — Заслаўскае, Крылова (рэзервовае; выкарыстоўваецца для пітнога водазабеспячэння), Дразды, Цнянскае, Камсамольскае возера і Чыжоўскае.

Шмат штучных вадаёмаў створана ў басейне р. Прыпяць. Іх будаўніцтва ў асноўным абумоўлена буйнамаштабнымі меліярацыйнымі работамі і неабходнасцю рэгулявання сцёку для мэт сельскай гаспадаркі і інш. Тут створаны буйныя рэчышчавыя вадасховішчы: Чырвонаслабодскае, Салігорскае і Любанскае.