НАЧА

На́ча

Іншая назва: Нач.

Рака ў Ляхавіцкім і Ганцавіцкім раёнах Брэсцкай вобласці і Клецкім раёне Мінскай вобласці. Даўжыня 42 км.

Правы прыток ракі Лань. Асноўны прыток — рака Тучанка (левы).

Пачынаецца на захад ад вёскі Канюхі Ляхавіцкага раёна, працякае па нізіне Прыпяцкае Палессе. Вусце за 2 км на ўсход ад вёскі Нач Ганцавіцкага раёна.

Плошча вадазбору 360 км². Сярэднегадавы расход вады ў вусці 2 м³/с. Сярэдні ўхіл воднай паверхні 0,8 ‰. Лясістасць тэрыторыі вадазбору 25 %.

Даліна пераважна трапецападобная, шырыня 0,5–1 км, месцамі да 2–3 км. Схілы спадзістыя, вышыня 5–6 км, на значным працягу адкрытыя.

Пойма пераважна двухбаковая, нізкая, забалочаная, зарослая хмызняком, шырынёй 0,3–0,6 км.

Рэчышча ў верхнім цячэнні каналізаванае на двух участках на працягу 22,6 км: выток — 0,5 км вышэй ад вусця ракі Тучанка, 20,8 км; 2 км на паўднёвы ўсход ад вёскі Руда Клецкага раёна — вёска Крышылавічы Ганцавіцкага раёна, 1,8 км; на астатнім участку звілістае, шырынёй 3–10 м.

Берагі ўмерана стромкія, вышынёй 0,4–0,8 м.

На перыяд веснавога разводдзя прыпадае каля 60 % аб’ёму гадавога сцёку.

Рака выкарыстоўваецца як водапрыёмнік меліярацыйных сістэм.