РАГАЗНЯНСКАЕ

Рагазня́нскае

Іншая назва: Збунінскае.

Возера ў Брэсцкім раёне.

Размешчана ў басейне ракі Серадовая Рэчка, за 30 км на поўдзень ад горада Брэст, за 3,5 км на захад ад вёскі Рагозна. Уваходзіць у Брэсцкую групу азёр.

Злучана каналам з возерам Белае, выцякае ручай, які ўпадае ў Серадовую Рэчку.

Плошча 0,4 км², даўжыня 0,97 км, максімальная шырыня 0,72 км, максімальная глыбіня 5,8 м. Абʼём вады 1,05 млн м³. Берагавая лінія (даўжыня 3,4 км) звілістая. Плошча вадазбору 13,33 км².

Катлавіна суфазійна-карставага тыпу, выцягнутая з паўночнага ўсходу на паўднёвы захад, складаецца з 2 плёсаў.

Схілы вышынёй 3–4 м, спадзістыя, пад лесам, на поўначы і ўсходзе возера акружана выдмамі.

Дно выслана пясчанымі адкладамі і сапрапелем, мелкаводдзе шырынёй да 100 м. Зарастае ўздоўж берагоў.