Дата стварэння: 07.08.2025 15:26:23
Дата змены: 12.02.2026 14:23:58
Сляпянская водная сістэма. У Антонаўскім парку.
Сляпянская водная сістэма. Каля Цнянскага вадасховішча ў мікрараёне Зялёны Луг.
Сляпянская водная сістэма. Вадасховішча ў жылым раёне Усход.
Сляпянская водная сістэма. На ўчастку каля вуліцы Казлова.
Сляпя́нская во́дная сістэ́ма
Сістэма штучных водных каналаў, вадасховішчаў і іншых гідратэхнічных збудаванняў ва ўсходняй частцы Мінска; уваходзіць у склад Вілейска-Мінскай воднай сістэмы.
Пабудавана ў 1977–1988 гг. Уключае вадасховішча Дразды, шэраг вадаводаў, вадасховішча Цнянскае, закрыты калектар на водападзеле рэк Свіслач і Слепня (Сляпянка), вадаём у мікрараёне Зялёны Луг, сістэму каналаў у даліне ракі Слепня і вадасховішча Чыжоўскае; апярэзвае тэрыторыю горада плошчай каля 90 км². Вада з вадасховішча Дразды па напорным трубаправодзе падаецца ў наліўное вадасховішча Цнянскае, адкуль праз сістэму каналаў і вадаёмаў і былое рэчышча ракі Слепня самацёкам паступае ў вадасховішча Чыжоўскае. Усяго створана 13 вадаёмаў (плошча ад 0,2 да 6,4 га, глыбіня 0,8–2 м).
Агульная даўжыня воднай сістэмы 26 км. Перапад вышынь 25 м. Прапускная здольнасць сістэмы 1,5 м³/с. Абʼём гадавога сцёку каля 8 млн м³.
Выкарыстоўваецца для водазабеспячэння прамысловых прадпрыемстваў, камунальнай гаспадаркі і воднага добраўпарадкавання прылеглых тэрыторый, рэкрэацыі.