ДРЫВЯТЫ

Дрывя́ты

Возера ў Браслаўскім раёне Віцебскай вобласці.

Размешчана ў басейне ракі Друйка (выцякае з возера) каля паўднёвай ускраіны горада Браслаў.

У возера ўпадаюць рэкі Усвіца (злучае Дрывяты з возерам Іказнь), Золвіца, Акунёўка, Рака (злучае з возерам Рака), 6 ручаёў.

Плошча 36,14 км², даўжыня 9,86 км, максімальная шырыня 4,5 км, максімальная глыбіня 12 м. Аб’ём вады 223,52 млн м³. Даўжыня берагавой лініі 37,6 км, на поўдні і паўднёвым захадзе ўтварае 3 вялікія залівы. Плошча вадазбору 423 км². Уваходзіць у Браслаўскую групу азёр.

Катлавіна запруднага тыпу, выцягнутая з паўночнага захаду на паўднёвы ўсход.

Схілы пераважна пад лесам, асіметрычныя: на поўначы вышынёй 30–37 м, месцамі разараныя, на поўдні да 5 м, забалочаныя.

Берагі пясчаныя і пясчана-галечныя, пераважна забалочаныя.

Пойма шырынёй ад 20 да 200 м, пакрыта водна-балотнай расліннасцю і хмызняком.

Мелкаводная зона шырокая (150–300 м), спадзістая, глыбакаводная зона — узгорыстая (упадзіны глыбінёй да 10–12 м чаргуюцца з падняццямі).

Дно да глыбіні 3,5–5 м выслана пяском, глыбей — глеем і сапрапелем (агульная магутнасць адкладаў да 11 м).

Уключае 6 астравоў агульнай плошчай 0,92 км².

Шырыня паласы прыбярэжнай расліннасці ад 35 да 200 м. Зарастае да глыбіні 3,5 м.

Растуць рэдкія для флоры Беларусі віды раслін: наяда гнуткая і наяда малая, гідрыла кальчаковая.

Водзіцца каля 20 відаў рыб: рапушка еўрапейская, сняток, шчупак, вугор рачны, лешч, верхаводка, густяра, карась сярэбраны, язь, плотка, краснапёрка, лінь, мянтуз, джгір, акунь, судак.

Паглыбленне рэчышча і будаўніцтва плаціны на Друйцы значна паўплывалі на ўзровень вады ў возеры.

Сярэднямесячная тэмпература вады да глыбіні 7 м у чэрвені 17,2 °С, у ліпені — 18,8°С, у жніўні — 17,7 °С. У зімовы перыяд паверхневыя тэмпературы складаюць 0,1–0,2 °С, прыдонныя — 3–3,8 °С. Замярзае ў канцы лістапада — пачатку снежня, лёд трымаецца да канца сакавіка, часам да сярэдзіны красавіка — пачатку мая.

Дзейнічае гідралагічны пост у Браславе.

На поўдні і паўднёвым захадзе да возера прымыкае лясны масіў «Бяльмонт». На беразе турыстычны комплекс «Дрывяты». У межах Нацыянальнага парку «Браслаўскія азёры» і зоны адпачынку Браслаў.