НЕДРАВА

Не́драва

Возера ў Браслаўскім раёне Віцебскай вобласці.

Размешчана ў басейне ракі Друйка (цячэ праз возера, злучае яго з возерам Неспіш), за 7 км на паўночны ўсход ад горада Браслаў, каля вёскі Маскавічы. Уваходзіць у Браслаўскую групу азёр.

Плошча 3,72 км², даўжыня 3 км, максімальная шырыня 2,23 км, максімальная глыбіня 12,2 м. Аб’ём вады 17,84 млн м³. Празрыстасць 2 м. Берагавая лінія даўжынёй 15 км, звілістая. Плошча вадазбору 808 км².

Катлавіна складанага тыпу, акруглай формы.

Схілы вышынёй да 10 м, стромкія (на захадзе і паўднёвым усходзе спадзістыя), суглінкавыя і супясчаныя, пад лугам і хмызняком. На поўначы озавая града вышынёй 15–20 м, парослая рэдкім хваёвым лесам.

Берагі нізкія, пясчаныя, дзе-нідзе на поўдні абразійныя.

Пойма шырынёй ад 10 да 100 м.

Мелкаводдзе пясчанае, да глыбіні 3–4 м дно глеістае, глыбей выслана сапрапелем.

Ёсць 3 востравы агульнай плошчай 2 га.

Шырыня паласы прыбярэжнай надводнай расліннасці да 120 м, падводная распаўсюджана да глыбіні 4 м.

Водзяцца сняток, шчупак, лінь, вугор рачны, лешч, верхаводка, язь, карась сярэбраны, плотка, краснапёрка, мянтуз, джгір звычайны, акунь, судак, гусцяра.

Пратокамі на паўночным захадзе злучана з возерам Поцех, на поўдні з возерам Неспіш, упадае ручай з возера Вера.

Размешчана ў межах Нацыянальнага парку «Браслаўскія азёры».

Па возеры праходзіць турысцкі маршрут.