АТМАСФЕРНЫЯ З’ЯВЫ

Атмасфе́рныя з’я́вы

З’явы, якія візуальна назіраюцца на метэаралагічнай станцыі і ў яе наваколлі.

Да атмасферных з’яў таксама адносяць метэоры.

Паводле сваёй разнастайнасці, мікрафізічных уласцівасцей і генезісу, атмасферныя з’явы аб’ядноўваюцца ў 4 групы: гідраметэоры, літаметэоры, фотаметэоры і электраметэоры.

У адпаведнасці з класіфікацыяй да гідраметэораў адносяцца вадкія і цвёрдыя часціцы вады:

• завіслыя часціцы ў атмасферы (воблакі, туманы або смуга);

• выпадаючыя часціцы — атмасферныя ападкі: абложныя, ліўневыя, імжа, цвёрдыя, вадкія, змешаныя;

• часціцы, што падымаюцца ветрам з паверхні зямлі (замець, снегавая нізавая завіруха, вадзяны пыл);

• часціцы, якія ападаюць (раса, іней, шэрань, галалёд);

• смерчы.

Снег і вада, што выпалі на зямную паверхню, не адносяцца да гідраметэораў.

Літаметэоры складаюцца з вялікай колькасці цвёрдых часціц, якія знаходзяцца ў паветры ў завіслым стане або паднімаюцца ветрам з зямлі (імгла, смуга, дым, пылавая замець, пылавая бура, пылавы ўраган, пылавы віхор).

Да фотаметэораў адносяцца: гало, сонечная карона, ірызацыя, глорыя, вясёлка, міраж, мігценне.

Электраметэоры — маланка, навальніца, агні святога Эльма, палярнае ззянне.

Назіранні за атмасфернымі з’явамі ў Беларусі праводзяцца на метэаралагічных станцыях і пастах, што дае магчымасць рэгістраваць асноўныя атмасферныя з’явы на тэрыторыі ўсёй краіны, сачыць за працэсамі іх развіцця, своечасова перадаваць штармавыя апавяшчэнні аб іх узмацненні.